合富輝煌（733）唔計喺「互聯網+」熱爆期，新拓線上瓣數嘅增值潛力，PB得0.6倍，平絕行家。又食住祖國樓市復蘇，呢家大型地產代理，今年大有條件大翻身，冷灶絕對值得睇實！
上個月，祖國百城樓市指數環比增加0.45%，扭轉咗再對上三個月跌勢，而深圳部份樓盤，更創出呎價新高。又合富輝煌拍住嘅內房，全部大牌子。按中國指數研究院統計，有合作嘅富力地產（2777），5月銷售額按月增加15.5%、萬科（深000002）16.3%、保利（滬600048）31%，金地（滬600383）35.7%。
估值平絕行家
睇到嘅係阿爺放水放寬限購，成個場環境改善，而合富輝煌有做代理嘅內房夥伴，銷情靚仔，集團今年turnaround機會好大。唔使估多，合富輝煌今年盈利，去番2013年時近2.2億元，已經講緊增長47%，就算計埋上年配股攤薄，都係得8.2倍預測PE。場內近磅行家易居，今年預測15倍PE、世聯行（深002285）57倍。
又合富輝煌上年溢價引入搜房（揸咗合富輝煌17%），每股入股價3蚊，合富輝煌現價（2.71元）仲係潛水，PB亦只得0.83倍。而場內專業評估，合富輝煌今年PB跌到得0.6倍，上邊世聯行講緊14倍PB、香江富陽（352）亦叫緊6.2倍。講PB，合富輝煌亦係平霸。
仲未止，喺「互聯網+」年代，合富輝煌自家開發「房王網」同「房王超級微信」，實行線上線下虛實配合。以搜房做個參考，家陣市值達到285億元，係合富輝煌18億元市值嘅16倍。合富輝煌呢壇製作煲得掂，一資本化，增值肥過肥仔水！
咪扯咁遠，煲合富輝煌，當翻半番到4蚊計數，今PE先得13倍，PB得0.93倍，未有耐追到行家。
錢雋
細價股專家
本欄逢周一、三、五刊出