阿里巴巴主席馬雲真係好吃得開，科技、金融、演藝界都識到好多朋友，唔少一齊有合作，大家都知佢同趙薇係friend，對方舊年底入股阿里影業（1060），最近又一齊投資瑞東（376）食大茶飯。新近就連劉嘉玲都被馬雲吸引，決定喺阿里巴巴旗下天貓開設個人品牌「Carina Lau」葡萄酒天貓旗艦店。
劉嘉玲近年開餐廳做老闆，早前又話過去法國酒莊傾生意，原來同天貓有關，佢搵到波爾多太陽集團做合作夥伴，透過天貓賣酒，佢話希望消費者可以親民價就買到法國原裝進口紅酒。
早前佢喺法國嘅玫瑰山莊（Chateau Montrose）獲封為左岸名莊騎士榮譽會員，加埋喺天貓開業，可以話正式進軍紅酒業，唔知幾時拍住馬雲投資上市公司，做埋上市公司老闆呢？