日本神級AV男優加藤鷹，一招「神之手」搞到對手欲仙欲死；智利嘅干沙路查拉都有「神之手」，搞到卡雲尼火都嚟。查拉之前已經有摸蘇亞雷斯下體前科，周三美洲國家盃八強對烏拉圭，佢再出手搞卡雲尼籮柚，辣㷫對手報復領紅被逐。可憐卡雲尼先有老竇惹官非，再「菊花」受襲，兼烏拉圭0:1輸波出局。
領紅兼八強出局
禮拜三場美洲盃，主辦國智利對烏拉圭，兩隊踢咗大半場冇入波，卡雲尼都已經火火地。63分鐘，烏拉圭犯規，智利有個罰球，卡雲尼好唔滿意，仲向球證投訴緊嗰陣，智利中堅干沙路查拉就快快脆開波，之後藉機行去卡雲尼旁邊，表面上扮晒老友，實質就睇中卡雲尼個籮！佢使出來自日本嘅神秘武功，就係加藤鷹嘅「神之手」，同卡雲尼個籮柚嚟一次試探性接觸。
當卡雲尼發現菊門一緊嗰陣，已經太遲，慘被性騷擾，但更大鑊嘅係，佢自然反應咁打咗查拉塊面一吓，俾球證睇到。球證向卡雲尼出示第二面黃牌，趕佢出場，至於過完手癮嘅查拉就乜事都冇。智利靠查拉呢招「神之手」搞到烏拉圭踢少個，人多打人少下，喺81分鐘由伊斯拿開紀錄。末段烏拉圭再有富斯利兩黃一紅被逐，烏拉圭最終喺九人應戰下輸0:1。
阿蘇下體曾「失守」
烏拉圭教練泰巴利斯賽後嬲到震：「我相信大家都好清楚卡雲尼被逐嘅前因後果，唔明嘅，我建議你睇吓電視或者睇吓相，答案一目了然。我知道球證睇唔到，但以旁證企嘅位置，應該睇得一清二楚。」卡雲尼真慘，呢次美洲盃蘇亞雷斯停賽，烏拉圭上下都睇佢食糊，點知分組賽冇入波，已經被人話佢擔唔到大旗。佢老竇前兩日仲為佢添煩添亂，喺家鄉揸車撞死人被捕。點知低處未算低，呢場後門失守、被罰紅牌、球隊出局，黑仔指數爆晒燈！
其實，查拉早有前科，佢兩年前喺一場世盃外防守蘇亞雷斯嗰陣，又藉機摸阿蘇下體，真係搞勻烏拉圭兩大神鋒！如果智利打到入決賽，有機對阿根廷，唔知查拉到時會點對付球王美斯呢！
識睇，一定係睇足英台【英波Live】：
http://soccer.appledaily.com
http://bit.ly/engballlive