嚟到轉會窗，唔少球隊都開始尋寶，搵啲好使好用又唔貴嘅球員返嚟。小弟覺得利物浦有眼光，執到件筍貨返嚟，就係以自由身加盟嘅占士米拿（圖）。講印象，占士米拿唔夠上一代嘅「雙特」咁出名；比下一代，又好似冇韋舒亞、佐敦軒達臣咁為人熟識，但小弟認為佢係𠵱家英格蘭其中一個最出色嘅中場。
米拿喺列斯聯出道，16歲就喺英超上陣，當年都有過英格蘭天才嘅外號，初出道時打翼鋒，腳法幾好，但佢喺曼城嗰陣被迫轉型，變成一個工兵。小弟呢幾年睇曼城啲波，總覺得大衛施華、拿斯尼同捷西斯拿華斯水準飄忽，其中拿斯尼嘅海鮮味就最濃，但米拿就剛剛相反，係個好穩定嘅球員。你唔會見到佢喺邊路一個扭幾個，但佢唔獨食，應該交嘅波就交，風格好大路，係個好易夾嘅球員；加埋佢踢咗咁多年英超，相信可以好快融入利物浦。
喺曼城呢幾年，米拿練成十八般武藝，中場咩位都打得，但最重要係嗰份專業精神，相比耶耶托尼、費蘭甸奴呢啲間中散步又失魂嘅球員，米拿落場真係好搏同集中，肯跑動、積極接應，成為一班大牌隊友嘅潤滑劑。雖然利記前場同曼城嗰班級數上有分別，但菲臘比古天奴同拉爾拉拿都係鍾意上腳同短傳，前場嘅風格幾啱米拿發揮。對於米拿嘅定位，小弟覺得佢可以踢一個「box to box」中場中，發揮佢覆蓋範圍大嘅特點，以無球跑動接應為主，間中跑到邊路，與古天奴、拉爾拉拿配合，或者短暫換位，可以令利記進攻更立體同多變。
文：咖喱