中國首富王健林一向動作多多，今年更喺體育事業大展拳腳，合共用咗超過10億歐元先後收購上屆西甲冠軍馬德里體育會20%股權、盈方體育體育傳媒集團100%股權等等。佢仲話，希望今年內萬達可以喺體育產業成為世界第一，要用銀彈征服體育界咁款。
王健林最近接受訪問時預告，今年之內，萬達至少仲會併購3間體育類企業，好快有一項關於中國足球嘅好消息宣佈。佢𠵱家好想搵一個體育控股嘅行政總裁（CEO），講明會「高薪以待」，但就一路都冇乜心水人選。
王健林提到阿仔王思聰時，都承認「兒子那麼火，真是出乎自己的意料之外」，仲分享講咗個小故事，話兩個月前佢訪問格力公司，董事長董明珠同佢講，公司嘅年輕女孩唔太關心王健林，只係問王思聰出唔出現。