內地股市端午前夕屈原上身玩跳水，滬綜指插低6.4%；前日假後復市先插4.7%，再由低位反彈7%，全日計漲2.2%，昨日再漲2.5%，以前日低位計至昨日收市位恰好反彈一成。A股係咪震完？技術上可能係，但話唔埋。若果A股再展升浪，但又冇利好消息，又冇業績憧憬，則底子較虛。事實上，A股仍有陰霾，過幾日就月結、季結兼半年結，銀根例牌緊絀；此外，A股正面臨去槓桿風險，要等孖展斬倉盤處理完先有力闖關。
友邦現黃金交叉
面對A股急升急跌，近排港股唔敢跟車太貼，反而比較跟外圍，希臘扭計只係市場噪音，唔足以影響港股大方向。恒指昨收報27404，升71點；下周一期指結算，呢幾日或靜待結算。現時入市吸納中資股，有A股波動風險，反而選擇非中資股抗跌力較強。友邦（1299）係基本因素好、有業績支持的非中資藍籌股，近日於50日線附近築底，走勢比恒指及H指強，反映防守力不俗；昨日10日線升穿20日線，出現黃金交叉利好訊號，可考慮吸納。
友邦業務遍佈17個亞太地區，涵蓋壽險、意外及醫療保險和儲蓄計劃等。早前公佈截至2月尾的首季業績，新業務價值（VoNB）按年升兩成，符合市場預期；VoNB利潤率增至46.8%。瑞銀調升友邦今年VoNB增長預測，由18%上調至29%，皆因中港業務強勁，佔舊年VoNB 44%，明年VoNB增長繼續睇好。
大行最buy中港業務前景，除了瑞銀唱好，高盛又認為友邦內地業務持續擴張，今年有望成其第三大市場；花旗則指友邦內地業務正處上升周期，內地對保障型產品需求大，呢類產品正係友邦強項；大摩就認為本港保險產品吸引內地人南下購買，亦使本港市場有新的增長點。
中港業務有幾勁，睇中保監數字就知，1至4月友邦原保險保費收入比1至3月增長35.9%，較國壽（2628）的13%、平保（2318）壽險的16.5%、太保（2601）壽險的15.6%為高，更拋離工銀安盛的3.36%。由於友邦在中國加入世貿前已取得外資獨資經營牌照，係內地現時唯一擁有獨資牌照外商；換言之，賺到錢可獨食。
友邦的股價對內涵值比率，與內地同業差距已收窄，過去9個月由50%收窄至20%。由於業務及管理俱佳，自由現金流有強勁盈餘，令股價可較中國同業有溢價。美國延遲加息及亞洲股市強勁，有助推動友邦中期業績的投資表現。友邦昨收報52.3元，上望58元。
割柑人
本欄逢周四刊登