陳凱琳（Grace）前日24歲生日，正當大家猜測緋聞男友鄭嘉穎會否與她慶祝之際，閨蜜之一的陳嘉寶為大家解開疑團，前晚陳嘉寶上載一張與Grace慶祝生日的大合照，亮點是鄭嘉穎與Grace頭貼頭排排企，變相公告戀情。本報記者事後向Grace求證是否正式公開戀情，她未有回覆，反而在ig貼了一張與爹哋和細佬慶祝生日的相片，相中Grace肉緊地捉實爹哋的手，狀甚溫馨。不過溫馨過後，昨日有周刊報道Grace因為嘉穎而激嬲爹哋。
秘密返港激嬲老竇
事緣上星期Grace去了法國工作，嘉穎夾好時間到當地與女友約會，雖然在父親節當日返港，但Grace未有通知家人回港及返家慶祝，反而直往嘉穎家中過夜，難怪Grace爸對女兒未有告之已返港兼在男友家中過夜後感不滿。有聖女之稱的Grace，事後亦被問法國之旅有否同房一事？她口窒窒地表示法國一行是工作，言談間又透露嘉穎很尊重她的信仰，但私事不想講太多。
至於前日有份出席生日派對的賴慰玲，她昨日出席劇集宣傳時，稱當晚只是一個很普通的生日飯局，問到是否嘉穎負責埋單？她略帶避忌地說：「我唔知喎，又冇話錢唔錢，我哋有買蛋糕同禮物，嗰晚我哋玩得開心。」她稱因為溝通問題，結果出現了多個蛋糕，其中一個是嘉穎所送。
問到是否經嘉穎和Grace批准才公開合照，賴慰玲說：「其實都唔係啲乜嘢，嗰張相影到大家都好靚同好開心。」她亦維護Grace說：「佢哋係普通朋友關係，留番啲空間畀佢哋。」據知相中有兩個女仔分別是嘉穎的表妹及表姨甥女。吳啟華亦被問到Grace與嘉穎的父女戀，他說：「唔怕，怕乜嘢，我之前都係父女戀。」
Niki低調懶理舊愛
此外，嘉穎的舊愛周麗淇（Niki）昨晚在金鐘出席護膚品牌活動，談到會否祝福嘉穎的父女戀？她說：「人哋嘅嘢我唔知，我諗冇乜所謂，鍾意咪得，最緊要大家開心。」不過當年他們拍拖比較低調，Niki說：「咁耐世紀嘅事，我唔識得點答。」至於會否鬥快結婚？她說：「呢啲冇得鬥快，我都係一貫作風，低調同開心。」
採訪：羅慧敏
攝影：葉君海