身兼上水鄉委會主席嘅北區區議員侯志強向八方透露，鄉議局新主席劉業強近日游說佢參加新界東補選：「發仔有叫我考慮吓，我諗吓建制派、泛民兩大陣營喺度，我機會微，但如果大家想我哋試吓，我咪考慮吓囉。」但佢話最終係咪參選，要經鄉議局今日嘅執委會討論，「要同一班大佬傾傾」。問到劉業強為乜鼓勵佢去馬？「佢覺得我比較勇，即係死來死去死唔去嗰隻，又想試一試新界東嘅新界人有幾多票，試一試實力」。
佢話若然參選，絕對唔怕被抹黑：「我仲可以被抹黑咩？我個身已油咗層蠟青，黑到令，我最驚人抹白箒！」佢指最終係咪參選，要視乎有幾多人選，而早前透露或參選嘅方國珊係好朋友，「有嘢咪大家一齊玩，4個人可以打麻雀，或者踢足球都得，7人賽、11人賽，亂局先有刺激，否則都冇高潮起伏」。