【鳩嗚乜乜乜】
呢排出街熱到儍，行過熟食中心，門口一陣熱氣攻出嚟，冇晒胃口，但𠵱家街市同熟食中心要超過85%檔主同意先可以裝冷氣。政府俾人嘈得多，噚日話將門檻降低，但只係降到80%，仲話減咁少嘅理由係「土地問題」以外另一個萬能key：循序漸進。
#同意門檻降至80%
政府噚日向立法會遞咗份文件，係今年7.1起將85%門檻調低到80%。份文件仲話知道有議員建議將門檻調低到五成，但係政府要循序漸進，「減少可能出現的衝突」，話願意定期檢視喎。
費清問過駿業街熟食市場自悠廚房老闆Marco（圖），佢曾經喺舖頭裝冷氣，食環署落Order要拆，佢話減低得嗰少少門檻簡直「多餘」。佢個街市有40幾檔，得一半真係招呼食客，其他都係走法律罅搞燒味批發、外送湯水等。Marco慨嘆預咗呢個夏天生意淡靜，真係要多謝政府。
費清
＃要生計，也要生活 ＃毋忘初衷