2016年度小一面試，贏在起跑線，不想爭，但競爭會找上你啊。各位家長，狼和熊都出來了，豬出沒注意，小學校長，不會放過任何機會，會對梁振英特別N次提及的人肉道具：五歲小孩追問，618事變，到底，小朋友，喔，即是未來社會棟樑和特區揸fit人（廢青是特區施政甩轆，唔算數），點睇8：28這場波？
問題一，小朋友，你認為31個建制派拉隊匆匆走人，是什麼原因？a計錯數，b揀錯隊友，c發脾氣。精叻仔會舉手答校長：「我估呢班叔叔和大姨是忽然肚子痛，要去大便。大便唔忍得呀。」對那個沒有離開但只是呆坐沒有投票的笨蛋，又點睇？「他坐着不敢走，肯定是已經賴了屎囉。」校長眉毛一剔，這小傢伙戇居兼自我，將來應該是一位眼淚也不能撼動的商界專才。
問題二，換了是你，有人叫你，等埋發叔，你等嗎？a等發哥來簽名，b發叔有發嬸等，c媽媽教我，叫做阿叔的都是金魚佬。一睇就知未來丁屋大地主的小男生舉手搶答：「發叔是暗號，一定要等。」點解呢？「唔等，大佬，邊有錢收喎。」校長不禁對這位新界富三代刮目相看。