易還財務（8079）主席蕭若元前日帶位靚千金蕭瑤瑤出嚟，即刻成為市場八卦熱話，查實金融界仲有人有靚千金，好似東驥資產管理董事總經理龐寶林，佢位寶貝女龐卓欣（Ada）今年參選港姐，龐寶林就唔只係芬佬，仲做埋星爸了。
曾介意女兒泳裝示人
Ada參選港姐後，連帶龐寶林都人氣急升，佢都話，以前傳媒搵佢講股，𠵱家連娛樂版記者都搵佢傾兩句，朋友間自然亦多咗話題。
佢指，阿女舊年從曼哈頓音樂學院畢業，平日最鍾意唱歌，擅長唱歌劇，佢曾經同阿女合唱音樂劇《The Phantom Of The Opera》裏面嘅歌曲㖭呀，但俾阿女批評佢唱得唔好。
原先Ada都冇乜興趣參選港姐，近月先至萌起呢個念頭，「佢話想當係一個training，睇吓參選過程對個人成長有乜影響」，作為父母都好尊重阿女嘅決定。
雖然Ada都不時喺社交網站上載自己水着照，之但係，參選港姐真係要着泳裝喺觀眾面前行來行去，龐寶林都承認，本來有啲介意，但係諗深一層，「𠵱家嘅後生女係咁㗎喎」!
Ada𠵱家與「十優狀元港姐」麥明詩一齊入圍16強，龐寶林點評時即刻老本行上身，形容自己嘅寶貝女屬於「潛力股」，麥明詩就係「焦點股」。佢讚麥明詩係叻女，讀書好叻，不過Ada就識得同人溝通，多才多藝，總之都係賣花讚花香喇。
龐寶林仲講笑話，將來可以搵阿女幫自己個基金做代言人吸客㖭呀。
李華華
mailto:[email protected]