馬雲認真想進軍電影業喎，佢旗下阿里影業（1060）繼宣佈投資由王家衛做監製嘅電影《擺渡人》後，噚日再宣佈，投資《職業特工隊：叛逆帝國》，成為套戲嘅中國區官方宣佈合作夥伴，同Paramount Pictures一齊合作搵銀，喺票務、衍生商品、電影推廣等方面合作。
雖然阿里影業唔係直接製作電影，但馬雲應該唔驚mission impossible嘅，因呢類題材一向好啱中國觀眾胃口，對上一集《職業特工隊：鬼影約章》，曾經喺中國蟬聯三周票房冠軍，中國區票房錄得1.03億美金，係美國以外最大嘅市場。
講開馬雲，佢噚日喺「來往」寫咗一篇鼓勵中國高考考生嘅勵志文，佢話好多成功人士都有高考失敗經驗，就算考唔到大學，都要用欣賞眼光睇自己，最重要係唔可以放棄。