我求大俠之前睇過單新聞，巴黎聖日耳門（PSG）高層同皇家馬德里講，如果皇馬夠膽羅致馬高華拉堤，佢哋就會出價買基斯坦奴朗拿度（C朗、右）反擊。嗰陣睇完都得啖笑，點知噚日睇英國《每日郵報》，仲有更好笑嘅，話曼聯竟然學PSG呢招，仲激到要買起半隊皇馬，包括C朗、加里夫巴利（左）、沙治奧拉莫斯、莫迪歷同賓施馬，報復皇馬死纏迪基亞唔放。據報，曼聯知拉莫斯嫌皇馬份約出手低，願意開出26萬鎊周薪挖佢過檔。
話晒堂堂大球會，曼聯唔會好似小朋友爭玩具、發脾氣咁啩！我求大俠就覺得做人應該要面對現實，迪基亞擺明冧皇馬，同曼聯又剩返一年約，就算今夏唔走，下年都走硬，曼聯不如花啲心機斟個好門將仲好啦。除咗迪基亞之外，下季同曼聯約滿嘅仲有中堅菲爾鍾斯，但據英媒報道，菲爾鍾斯應該會喺呢個星期內同曼聯續約，待遇會同基斯史摩寧睇齊，有八萬鎊（約98萬港元）周薪。
另外，曼聯左翼艾舒利楊格上周六小登科，同佢拍拖多年嘅女友拉埋天窗，楊格夫婦已經有兩個小朋友。
識睇，一定係睇足英台【英波Live】：
http://soccer.appledaily.com
http://bit.ly/engballlive