政改意外地高票遭否決，得嗰8票支持，一直掌控大部份建制派投票意向嘅中聯辦，肯定要為此問責。有位同西環中人好稔熟、熟悉佢哋運作嘅建制派同花生友講，今次搞出大頭佛後，聽聞中聯辦主任張曉明將會被調任，最大機會是今年底前、最遲就明年3月人大兩會，就要「起身」執包袱咁話。
傳王志民接任
其實政改否決後，呢位建制中人就同花生友講，一名低於人大委員長張德江、高於港澳辦主任王光亞嘅人，將要為事件負責，但名字不廣為人知，呢名官員勢要被「燉」，但較為港人熟悉嘅中聯辦主任張曉明，則無可避免要為甩轆事件負責。
呢位建制派自誇，以往他曾聽聞過有關中聯辦前副主任李剛被調到澳門、中聯辦前副主任王志民調回北京擔任港澳辦副主任，證明自己向來收到嘅消息準確無誤，所以今次都拍晒心口，「肯肯定」張曉明要被調走，最快可能係今年年底前。咁樣調走小明後，接任人係邊個呢？呢位建制派認為，其中一個可能人選係王志民。
今年58歲嘅王志民，其實十分熟悉香港情況，1992至1998年喺中聯辦前身新華社香港分社時已經身居要職，其後佢被調返內地。2006年，王志民再被調至香港，曾出任中聯辦副秘書長，08年升任為中聯辦副主任，今年4月則調返北京出任港澳辦副主任接替退休嘅徐澤。
花生友