網上瘋傳地盤佬溝通技巧，仲有晒模範情景對話，等一班地盤工人學習如何沒有粗口對答。雖然千頌C認為，地盤佬要講粗口，先至係「職安真漢子」，不過本人都認為，同人溝通甚至係安慰自己時，只要將自己EQ小宇宙爆發，人與人之間自然和諧啲，生命都富足啲，以下七個情景對答，大家不妨參考吓，或者可以令你成為「政經真漢子」。
情景一：
當高位買咗漢能（566）時
不要說：「今次真係X街，而家點X算呀？」
試着說：「今次真的失算了，但不用怕，發叔也等到了，相信最終也可以等到它復牌回家鄉。」
情景二：
同阿哥買安碩A50（2823），佢自己高位沽出後感高興
不要說：「唔X係呀？阿哥你不顧一切，自己上救生艇，就自鳴得意。」
試着說：「對唔住，是我自己搭沉船。」
情景三：
買21蚊翠華（1314）熱奶茶俾人笑豬咁蠢
不要說：「X你！有冇咁崇洋呀，40元一杯Starbucks你又唔X？」
試着說：「土地供應不足問題。」
情景四：
財演叫人買咗隻跌咗50%嘅股票
不要說：「我一早講明可能升亦可能會跌，風險要自己承擔啦！」
試着哽咽地說：「我要向全香港曾經支持過我的股民說聲對不起，11年財演工作，雖然用了最大力量，但都得不到結果，所以我向所有支持過我的股民致歉。」
情景五：
想買隻股票，點知行咗出門口隻股升左八成
不要喊着說：「我真係好想買這隻股票，買唔到呢隻股票，我真係很難過。」
（加背景音樂：誰能及我驚天動地 連流淚都覺嫵媚）
試着說：「我是有自由意志的人，我不應怪責任何人，這責任我自己一力承擔。」
（加背景音樂：遲來一秒鐘 遲疑一秒鐘 從迎接你變做目送）
情景六：
朋友怪你唔跟飛買股票
不要說：「你話買我就乜都唔問跟住買，咁仲使分戶口嘅？merge晒佢呀？開個聯名戶口咁呀？」
試着說：「我已於股票市場外看好它，你會參與蘋果投資王的模擬倉嗎？」
情景七：
朋友質疑自己，次次都呻買股輸錢，一定係講大話。
不要說：「我好介意被人話我講大話。」
試着說：「我那有那麼多大話，主要是我人蠢無藥醫。」
千頌C
by千頌C@堆填區
http://fb.com/winbigwok
本欄隔周三刊登