今季護級失敗嘅地區球會和富大埔，按例新季就要降班，點知獲新贊助商支持繼續出戰港超聯，加上足總亦希望新季有10隊角逐，既然「神女有心，襄王有夢」，大埔秘書長陳平噚日話會回覆足總，願意接受挽留，只要大埔區議會下月初開會通過就可拍板參賽。
陳平話，球會向來尊重足總升降制，但新贊助商表明想踢港超聯，加上有球會唔玩，足總好想新季有10隊角逐，而球會考慮過多個因素後就同足總講願意留級，具體班費同方針要等定晒啲嘢先公佈。其實足總挽留降班隊都唔係第一次，上次就喺2006年球季挽留尾二、按例要降班嘅南華，結果當然成功，而南華仲再獲羅傑承擔任足主而大搞。陳生仲話，下季有比較充裕班費去組軍，正着手搵緊啲有大埔背景球員加盟，希望球會睇上去有多啲地區特色，亦會強化球會青訓。不過，足總噚日仲未收到大埔回覆，好在仲有時間，希望冇問題。
李康廉有望再上山
另外，南華近排靜咗落嚟，據講出席完亞協盃八強抽籤儀式返港嘅教練米路會處理增兵；由於新兵陳文輝早前跟港隊備戰世盃外期間左膝十字韌帶斷咗，下月中入院做手術，復出無期，加上羅港威借用期滿，會返番去飛馬，米路就有意搵李康廉（小圖）上山，但要清楚佢腰傷舊患係咪冇事先。