噚日喺中環渣打銀行旗艦分行外天橋上，掛咗一幅30米乘5米、寫住「渣打，別為煤破壞大堡礁」巨型橫額（圖），原來係綠色和平掛上去，旨在「倒煤」。綠色和平批評渣打出任澳洲加里利盆地（Galilee Basin）嘅卡米爾煤礦項目（Carmichael Project）財務顧問，呢個計劃會破壞世界文化遺產大堡礁，要求渣打撤出項目。
綠色和平資深企業項目顧問李詠心話，科學家已經警告，繼續開採煤礦會影響大堡礁嘅生態健康，而煤炭引致嘅氣候變化問題，亦對全球珊瑚礁帶嚟極大威脅。卡米爾礦場需要建造一條運送煤炭至大型煤炭港口Abbot Point嘅鐵路，又要挖掘大堡礁附近海床，肯定會破壞座頭鯨、小丑魚同唔少海洋生物嘅棲息地，而燃燒呢個煤礦所出產嘅煤炭每年會產生1.2億噸二氧化碳，差唔多等於香港碳排放量嘅3倍。