除咗報稅，呢個世界上都冇嘢煩得過攞美國簽證，排隊驗身查家宅就梗㗎喇，不過更不幸嘅係，近來美國國務院領事事務局個system都hang hang哋，搞到啲簽證嚴重delay，費清兩個朋友都先後遇到阻滯，喊都冇謂。
#6.9後入咗表要再預約
其中一位做旅遊顧問嘅朋友申請商務簽證，今個月9號見領事，正常情況下，一、兩日內就會知批唔批，點知到噚日都未批。最慘係佢要去美國開會，機票都訂埋，今次俾美領事蹺起，要花1,200蚊改機票。至於另一位朋友阿詩，佢已拎到贊助去美國藝術交流，美領事講好咗上個禮拜二會發簽證，點知又係到𠵱家都未出到，仲死撐話合理嘅辦理簽證時間係60日！
費清噚日上網見領事館出咗個通告，大意話領事事務局個海外簽證系統有技術問題，唔係針對某一個國家或者某一種簽證類別，今年6月8日後批准嘅簽證未印到，6月9日之後嘅申請同埋新申請都處理唔到，入咗表嘅就要重新預約，但冇話幾時有得攞。家陣啲國家機器做嘢硬係要甩轆蝦碌先安樂嘅，簽個證去旅行疏乎吓啫，唔係咁都要等埋發叔吓！
＃要生計，也要生活 ＃毋忘初衷
費清