建制派「等埋發叔」而令立法會支持政改得番「8票守尾門」，唔單止成為笑柄，仲搞到建制派人心惶惶，北京未話大刑侍候，個個急住上演「一哭二鬧三上吊」博甩身。當壓驚又好、解穢酒又好，中聯辦主任張曉明已經約定建制派，周四晚9點半茶敍，唔少好事之徒梗係問呢次使唔使「等埋發叔」？八方打探過，據知發叔呢排身體唔多好要休養，應該去唔到，呢鋪建制派唔使再擔心，因為等埋發叔而甩轆。
鄉紳習慣早瞓
八方聽聞自從上次政改蝦碌後，發叔心情都唔多舒服，而上周趕返立法會時已經抱恙嘅佢，身體狀況依然麻麻，政改後都繼續休息，減少咗好多活動。
大家又唔好忘記喎，鄉下人唔慣夜蒲囉，發叔講㗎！盛傳2008年田北俊喺新界東立法會選舉爭冧莊，夜晚8點幾發現唔夠飛，打畀發叔希望呼籲鄉事派過票救亡，點知發叔話太遲，因為鄉紳慣咗早瞓。嗱，小明呢餐夜茶9點半先開始，鄉事mode嘅發叔，更加大條道理no show，所以建制派今次可以放心，唔使「等埋發叔」都可以同小明一齊剝花生，如果有埋蝦碌做小食，當然會更加應景。
發叔唔去，其他「主角」又到唔到？八方聽聞一如政改投票，西環希望今次活動越齊腳越好，所以將原定嘅晚飯改為夜茶，希望遷就到最多人。八方當然最想睇，互轟過嘅田大少同二少，以及互相指摘過嘅建制派再同枱，到底會唔會反枱？
李八方
mailto:[email protected]