太古地產（1972）旗下位於港島司徒拔道嘅豪宅OPUS HONG KONG「傲璇」以外形設計獨特聞名，呢個項目只得12個單位，至今賣出一半，由於每個單位都要幾億元成交，所以每次有消息話賣出單位，大家就好想知道買家是誰，可惜，除非以個人名義買入，否則好難知買家身份。
最近有一宗成交嘅買家身份曝光，早前OPUS嘅2樓單位，有買家以3.68億元買入。田土廳最新資料顯示，買家登記係Tandijono Holik與Sam Ang,Kanika，兩位似乎係東南亞人士，後者應有柬埔寨背景，當地有間銀行叫Vattanac Bank，佢就係呢間銀行嘅執行董事。佢哋買入呢個單位實用面積5,146方呎，有個52呎平台，單計呎價7.1萬元。