噚日facebook群組「將軍焦點」，發現寶琳新開張無耐嘅百貨店「名創優品」，不單貨架淨係標咗簡體字「缤纷色 自由选」（繽紛色 自由選），店內唔少產品都直情用埋簡體字標示，好似風扇、尿袋同埋電芯都係，得番好少仲係香港代理嘅貨品係用繁體字咋，惹嚟唔少網民鬧爆「大陸化」，有人聲言要罷買，抗議「國產嘢扮日本貨」。
國產扮日貨
名創優品睇落真係幾日本風㗎，標誌似足Uniqlo，舖面設計同貨品式樣就抄足無印良品，呢個品牌聲稱係日本年輕設計師創立，但網民發現，佢哋實情係大陸廉價百貨連鎖店，近幾年大肆進軍香港，喺觀塘、元朗、荃灣、旺角及將軍澳都有分店，封咗呢間店為山寨之神。八方噚日問過濕平嘅市民，有人話用簡體字唔係幾好，大陸造嘅食品又驚有事唔會買，但亦有市民見到樣樣嘢都十零廿蚊，唔理咁多，始終價錢最實際。
識睇 睇留言
Lawrence Law：着眼點係簡體字，對本地人嘅唔尊重，唔好小看生活上嘅滲透。
Joey Lee：但是我有買這間公司的香水！很好用！唔錯！所有嘢都好平！
Fuk Keung Lo：共匪沒有甚麼叻，只識抄襲，好討厭。
Lee Leung：原來大陸人最愛做日本狗，買日本貨。
Michael Fung：日本城也非日本。
Ec Chan：山寨嘢，垃圾！
資料來源：《蘋果》網頁