溫布頓網球公開賽下星期一就開波，各位參賽球手呢幾日都陸陸續續到咗英國，為呢項本年度第三個大滿貫賽事做好準備。其中幾位女單球星，就選擇唔同嘅方法去備戰，即管睇吓邊樣最有效。
禾琪玩埋煮飯仔
兩位近況麻麻嘅金髮美女寶查同禾絲妮雅琪，今個禮拜就參加伊斯特本賽，希望寓賽於操，盡量提升狀態。不過，嚟得呢個南部海邊城鎮，有時間嘅就梗係要欣賞吓風景啦。由於兩位都係前列種籽，頭一輪比賽輪空，佢哋早幾日就抽空出席宣傳活動，行吓沙灘又行吓山咁，其中一站就係當地著名景點Beachy Head懸崖。睇相望到靚人靚景，估唔到呢個懸崖原來係當地人嘅自殺黑點。
除此之外，禾琪亦都去咗上堂學煮飯仔，玩得不知幾開心。話時話，禾琪入得廚房，行出戶外又唔會怕曬怕做運動流汗，咁嘅好女仔，好多港男都只能夠嘆句「這些機會不是屬於我的」，可惜佢位前度未婚夫麥艾萊咁唔識貨。自從上個月尾法網次圈出局之後，禾琪完全冇參加過任何正式比賽，所以今次喺溫網開波前一個星期參賽，搵番啲比賽感覺真係好重要；身為高球一哥嘅麥艾萊，喺啱啱打完嘅美國公開賽開打前就唞咗兩個星期，最終得第九，唔知同禾琪公然撐另一參賽球手戴爾有冇關係呢？
細威舒娃避戰熱身賽
至於衞冕溫網嘅姬維杜娃，本來都有參加伊斯特本賽，但係星期一就因為身體唔舒服而退賽，話要爭取時間休息，以最佳狀態出戰溫網。話就話伊斯特本係溫網前最後一個熱身賽，但係贏過大滿貫嘅球手似乎都唔太緊張，例如加埋贏過25個大滿貫錦標嘅莎蓮娜同舒拉寶娃，兩位都冇報名參加呢個比賽，即係話今年一場草地賽都未打過就會直接去打溫網。
盤生意同網球事業一樣咁重要嘅舒娃，今年繼續開舖賣糖，前幾日仲去咗睇時裝展覽㖭。舒娃嚟親倫敦都會搭地鐵出入，佢位男友狄美托夫睇嚟都好enjoy呢種平民生活，post咗張搭地鐵時影嘅搞鬼相。24歲嘅佢靠雙腳「晾」喺兩邊扶手柱，成個人倒吊起，個膝頭少啲力都真係唔掂。（now634台明日6:00pm直播伊斯特本網賽）
蘋果20年 企硬我敢言
http://20.appledaily.com