還有兩日，滿載港人回憶的荔園正式開幕！繼本報早前披露「滑稽恐龍屋」、「荔園城堡」、「鬼馬飛天椅」同「淘氣小木馬」後，最期待的景點終於出現！就係荔園迷最引頸以待的「吸蕉大笨象」、「掟階磚」同埋「叮叮船」！
港人最關心當然是「吸蕉大笨象」啦！雖然是機械象，但目測也有四米高，而且很逼真，不覺「膠」味。當然它不會有Tino的臭味，但只要你餵食道具蕉，它都會chok一個懶驚喜表情，象鼻會「揈吓揈吓」，和發出「象」真度極高的機械聲。
至於「叮叮船」幾乎倒模原作，六隻顏色鮮艷的小船仔準備就緒。昨日所見，部份搖鈴已經安裝好，池水亦已ready。當然還有壓軸的「掟階磚」！基本上跟以前的大同小異，都是白色階磚，中間有個洞。但驟眼看，中間的洞似乎比以前的小。至於獎品方面，獎品名單仍未見，未知會否跟以前一樣送香口膠。
撰文：蘇芬妮
吸蕉大笨象四米震撼
荔園鎮園之寶——大象Tino地位無人能及，但當年垂垂老矣的牠傳出陣陣臭味，有點於心不忍。今日的吸蕉機械象，一樣有兩米高，會chok出驚喜表情和發出機械聲。
掟階磚縮食錢窿
還記得當日有幾氣餒？中間個「食錢窿」使唔使咁大呀？今日階磚大小相若，惟獨「食錢窿」小了，唔知係咪送香口膠呢？
旋轉木馬加添華麗
當年的「旋轉木馬」號稱用上3,000萬種（真係咁多？）顏色製作，陳慧嫻在此拍唱片封面。今日木馬以原作為藍本，不過相信少了點「色彩」。
恐龍屋滑稽現身
恐龍貌似ET，曾在《回魂夜》出現。今日恐龍滑稽化，頗有垃圾蟲feel，而它其實是一條約兩層樓高的旋轉滑梯。
叮叮船延續童真
叮叮船最正當然是潑黑色水和瘋狂搖鈴。今日基本配套依舊，係池水肯定沒有從前的污濁。
碰碰車鮮色搶眼
以前路過此處已聞到𤓓味，車場又暗到飛起。今日碰碰車車身鮮色搶眼，驚死你撞唔到！
荔園城堡燈飾點綴
標誌着荔園入口，老虎是荔園icon。今日城堡大同小異，還有燈飾，入夜必成景點。
鬼屋變身魔靈小學
以前的鬼屋，看到青面女鬼頭已嚇到腳軟。今次以猛鬼小學為藍本，入場費為100元。
蘋果20年 企硬我敢言
http://20.appledaily.com