公共醫療醫生協會一年一度周年晚宴噚晚舉行，食物及衞生局局長高永文作為嘉賓，當然要上台分享，仲就建制派喺政改表決甩轆事件抽水，笑言香港醫療體系應付今次南韓新沙士疫情，過程中都有甩漏，但好彩問題未至於似立法會咁嚴重，否則都幾大件事。
佢話雖然香港暫時仍然好彩，未有新沙士個案，但已經對醫院造成好大衝擊，佢日日都要捉住醫管局行政總裁梁栢賢商量對策，好在大家有商有量，先至頂得住。
史泰祖帶隊西安交流
講開新沙士，香港對南韓嘅外遊警示仲未解除，班醫生想去旅行有乜嘢選擇？有醫生話畀八方知，原來醫學會會長史泰祖早排帶隊，同班90後醫生去咗西安交流，當然亦無錯過一睹兵馬俑嘅機會，仲試咗西安地道美食肉夾饃啦！
而同樣以嘉賓身份出席晚宴嘅城市論壇主持謝志峰，就喺台上特別感激幾位在座醫生，包括曾做食衞局副局長嘅港大現任醫學院院長梁卓偉，話因為佢當年做官，成日肯上城市論壇，喺官員中都算難得，台下嘅梁卓偉就笑言謝志峰太過誇獎，其餘人見狀都哈哈大笑。