上周四大奇蹟日，立法會以8票贊成、28票反對的結局否決「袋住先」。大家瘋狂食花生，fb連日抽水，衝出國際。笑又笑過，責又卸過，是時候面對現實。我們追訪港視劇集《選戰》中與中聯辦王主任關係密切、本為宋漫山出謀獻計的振民黨秘書長江日東（楊英偉飾），請教他如何收科。但日東面對這編劇都寫不出的橋段，真是愛莫能助，「拆？點拆呀？斬雞頭燒黃紙，搵個秘密地方滴血為盟，同中央講聲對唔住啦！惟有係咁！但你係民選議員，你第一個唔係同選民交代而係同中央交代，難辭其咎！」
「理論上係有陰謀，但睇落唔係陰謀先好笑。」葉劉的淚、林鄭的不知所措，演起來就是方法演技，由內而外再回到內，冇得扮。「編得出這劇情都要畀個最佳編劇及最佳鬥智劇獎項佢。」《選戰》裏江日東、宋漫山、何松柏、葉晴為選特首各出奇謀，張癸龍更是特別不擇手段， 但代入現實世界，「原來烏喱單刀。若硬要說是陰謀，就是要搶掉泛民的曝光率。你看，完全冇影。」
其實在江日東眼中，始作俑者莫如離地建制派向來有不錯的背景，也是既得利益者，不用出術，做投票機器就好。結果有事起來不懂走位，不若泛民在困難中長大，識走位。更慘的是，中國人本就喜歡跟大隊，建制派議員習慣跟大隊靠邊站，哪邊人多就站哪就最保險，誰知原來大家都買錯保，買了個大教訓，「但政治不是跟大佬嘛！吳克儉應把事件放入教育課程裏，教大家有獨立思考，要醒覺，要有懷疑精神。看清周圍才好下決定。」是江日東最有前瞻性的建議。
手騰腳震補鑊去
馬後炮於是無補，鬧劇已經寫入歷史，放眼向前，補鑊才是要事。補鑊的方法有好多，江日東抱着幾把纓槍、刀刀劍劍及「赤兔馬」下車，演練補鑊三式。
方法一：
其中一個最快捷方便經濟的方法，就是建制派先停止互插，即組合唱團，憑歌寄意：「你怕死 阿公請輕判暫時別降罪；唔扮喊 下半生只可靠安眠藥進睡…」節錄《假如麒麟說下去》
詞：梁柏堅 ／曲：于逸堯／原曲：假如讓我說下去
方法二：
江日東：「第二個方法比較複雜，需要排練及一點藝術觸覺。就是一班人排練樣板戲表明心迹。像《白毛女》、《紅燈記》、《沙家邦》、《智取威虎山》等等。」
方法三：
人始終都是現實的，最實際一招，莫如將功補過！
他執起武士（膠）刀：「講多無謂，這個moment，我們還是衝去釣魚台，將功補過！殺呀！」
記者：陳慧敏
攝影：楊錦文
