【科技籽：出閘搜新】
數「亞洲亞洲」歷來最創新節目，《魚樂無窮》絕對要記於史冊，正當不少「粉絲」擔心此神級節目有機會隨「亞洲亞洲」煙消雲散，近日Gadget Guy發現有一條遙控魚仔到港，放進魚缸，隨心控制似與缸中魚兒親身接觸一樣，即時進化成互動版《魚樂無窮》，毒L指數亦同時提升至另一層次！
像真度頗高 手動有難度
其實機械魚多年前就出現過，不過都是自動游，而這隻新出的「ROBO Fish」則比較特別地提供了遙控功能，加強了互動性。魚仔外形極小巧簡單，以熱帶小丑魚作設計，身形跟真魚相若，而會郁動的部份就只有尾部，講真，放進水中像真度真的頗高！操作方面亦如外形一樣簡單，遙控左右兩邊都設操控桿，左邊控制速度，共有三段速度選擇；右邊為方向掣，雖可全方位轉向，但實則只能控制魚仔向左、左前、前、右前、右共五個方位。實際試玩，感覺比想像中難操控，主要是因為轉向靈敏度不算高，未能做到急轉彎，因而易撞牆。另一方面就是魚仔設計始終較簡單，未能控制浮沉，只能靠向前游下潛，或靜止來浮起。不過玩落熟習後便大多可操作自如，而遙控魚本身只屬兒童玩具級別，加上設計如此小巧，有這樣的操作模式已相當不錯，不能要求太多。
換尾更好玩 備貓貓模式
除了手動操作，遙控魚亦內置三個自動模式，分別是水池模式、魚缸模式和較特別的「貓貓模式」。前兩者實試過後感覺大同小異，都是極速向下潛，再轉向及上游，據說明書介紹，在水池模式中，魚仔會做更多花式，但今次測試的魚缸或未夠大，因此未能看到分別。另一個「貓貓模式」就是魚仔會自動靠魚缸邊游動，並會間歇式停頓，務求引貓出動，貓奴大可試試和貓星人玩樂一番。另外遙控魚備有一條替換尾巴，雖然開叉外形有點不相襯，但實試發現速度更快亦易操作更靈巧。充電方面，跟很多小型遙控玩具一樣，只需插在遙控器上即可，相當方便。遙控魚包裝已是一個小型膠魚缸，加水即玩，細心設計抵讚。總括而言，個人認為魚仔宜在較大空間操作，亦適合和小朋友一同玩樂，可𠱁小朋友開心之餘，形象亦由毒L變成愛心男（或女）！
同場加映：遙控暴龍
除了遙控魚，近日侏羅紀世界大熱，一隻名叫「Meet Miposaur」的遙控恐龍亦殺到。這恐龍特別在於除了可用智能裝置透過app操控外，更隨機附上遙控球，只要轉動球上的模式即可控制恐龍跳舞、追波、隨行等動作。即使不用手機又不用遙控球，恐龍亦能以感應器感應動作跟你互動，不過實試後發現感應一般，未能每次都做出相對反應。
查詢：JC Shop
銅鑼灣 wtc more 世貿中心408號舖
記者：韓繼聰
攝影：梁志永
編輯：謝慧珊
美術：吳子豪