今期（24日）快活谷賽事，只得兩位騎師跑足八場，就係雷神同郭能，其中雷神嘅「花紅」、「優勢」等都係新近上名馬匹，騎師王彩池買佢，肯定熱到燙手。不過半冷揀郭能其實有得諗，一來座騎滿額，二來個天都幫晒佢。八匹胯下馬中，其中六匹「日月光華」、「福駿寶」、「駿擊快車」、「獅鷲」、「誠信寶駒」及「帝國勇將」排一至三檔；「萬馬奔騰」五檔亦唔錯，最差「珍珠有利」都有六檔。郭能本月初贏「聰敏不凡」之後靜咗落嚟，最近又停賽，難得今次咁好手氣隻隻靚檔，唔搏甩髀就假咯！
最值得重視係一檔之時廐馬「帝國勇將」，上半季近乎冇跑過，今次只係久休復出第三戰，季尾不少對手已疲，佢就體力充沛。上仗同程谷草1200米大冷追入第四，反映狀態開始回勇；此駒曾兩勝二班賽，包括擊敗級際賽盟主「一寶」，一旦重拾戰鬥，今次呢批三班對手絕對唔係佢手腳。今朝晨課亦有動靜，只見練馬師霍利時喺馬房閘口，捉住郭能傾咗好耐，遲遲唔放佢走，擺明對今戰高度重視，就算唔買郭能騎師王，「帝國勇將」都應該睇高一線。