回望伯金，轉眼間已係20年前登陸英超，可惜荷蘭風在歐洲已颳唔起，明日之星迪比，投紅魔鬼都只係值2,500萬鎊（約三億港元）左右，點計都抵過叫價去到5,000萬鎊嘅另一英格蘭翼鋒史達寧啩？
伯金當年26歲仲破到阿仙奴轉會費紀錄，以750萬鎊加盟；最後俾雲格再改造，聯合一眾法國幫，幫球會攞咗三個英超冠軍，不少英超金球，令球迷回味不已；廿年後，法國幫續喺歐洲轉會市場搶手，保羅普巴，勢做今夏「標王」外，成條法國國家隊中場線嘅年輕人，都係大球會爭奪目標。筆者好欣賞嘅摩納哥防中干度比亞，最終轉投意甲，英超迷會覺可惜；荷蘭國家隊雖然去夏奪世界盃季軍，但熱潮過後，今夏應該較淡靜。
荷甲人，近年俾歐洲各大球會挖得太深，揠苗助長，令荷甲水平持續下降；對上一支踢到歐聯淘汰賽嘅荷蘭隊已係2006/07年嘅燕豪芬，當時16強淘汰阿仙奴，去到八強先俾利物浦踢出局。三大傳統強隊燕豪芬、阿積士同飛燕諾，去季淪落歐霸盃32強分途出擊，只有阿積士能過多一關，16強止步。據IFFHS（國際足球歷史和統計聯合會）報告，荷甲喺2013年全年全球聯賽排名，跌至21位，2014年稍回升至17位，比羅馬尼亞及厄瓜多爾聯賽仲低。第一位係西甲，第二及第三位係意甲及微跌一級嘅英超。
睇番伯金嘅母會阿積士，踏入21世紀，出走嘅大牌球星有雲達華治、史奈達、亨特拉爾及烏拉圭人蘇亞雷斯，個個獨當一面；可惜現在星味黯淡，上季荷甲被燕豪芬拋離17分同23個淨得球，屈居亞軍。該隊已連續兩季沒有球員躋身聯賽十大射手行列；剛過去球季，燕豪芬嘅迪比以22球榮膺神射手，阿積士最勁係波蘭國腳米利克，僅得11球，阿積士以往尚攻風格蕩然無存，領隊法蘭迪保亞小心烏紗不保，到時坐正，可能就係佢助手伯金，世界輪流轉，果真細小。
同雲高爾唔妥嘅現任修咸頓領隊朗奴高文，剛公開嘲迪比唔值咁貴，話曼聯大把錢所以唔志在，又彈荷蘭後生仔通常冇體力捱足全季。睇番去夏喺荷甲過英超搵食嘅四大貴價兵，施安迪莊、真馬特（紐卡素）、杜辛泰迪治（修咸頓）及戴利白蘭特（曼聯），又真係唔算標青，尤其前兩人去到紐卡素，幾乎下季要英冠再見。不過，信荷甲始終係球星搖籃，全個聯賽最勁嗰個，率先畀雲高爾搶到手，迪比又後生又可翼可鋒，值得期待。 回望「水貨」法卡奧同迪馬利亞，你會更覺，呢位有加納裔嘅新紅魔幾靚仔！
文：波神