上周才說建制派做事成日甩甩漏漏，十次有九次幫倒忙，哪會想到最難看最「甩轆」的一幕，竟在最最關鍵一刻出現。
連平日支持開建制的朋友都不禁搖頭嘆息，不敢相信在這樣莊嚴的事情上，建制派的「精英」，居然犯上低級至此的錯誤，阿爺的震怒，不難想像。有建制粉絲更同Mary講，𠵱家同枱食飯，提都不敢提起這事，省得被同場泛民支持者「寸爆」喎。
Mary心諗，咁肉酸，被人笑吓都冇計，「骨」聲吞下去算了。反而職業病發作，密切留意各界人士的反應，尤其建制陣營，到底如何拆解危機。
咁大鑊，有份在場的都想表態兼自白，結果由星期五一早的《千禧年代》、《在晴朗一天出發》，到周末的政經訪問，一路數落去，上場的全部都是有關人等，有人幸災樂禍，認叻認唔切、有人追究責任、有人落淚補飛兼交心……無論如何，危機之中，正是考你平日傳媒功夫夠不夠，咁多人想講嘢，你行情唔熟，人脈唔夠，未必第一時間輪到你囉。
時窮節乃現，有時人的氣度胸襟（於企業亦然），在這種環境就原形畢露。這邊廂，自由黨唔覺意成為撐政改最給力的政黨，據說中聯辦曾表示嘉許，不知是否興奮過龍，田少竟在社交媒體貼張豬圖，加句「邊有咁多陰謀論，實情係人蠢無藥醫。」那邊廂，工聯會黃國健又直指民建聯要有人負責，直插同路人。
我想，田少會不會開心得太早，阿爺冇大家咁knee jerk，愛你恨你都未出鞘，此刻不宜過份樂觀。至於建制陣營之間亂飛的暗箭，更是毫無必要，咁弱勢，還能afford不團結嗎？
甩轆是否一無事處？又唔係嘅，起碼反高潮得來太騎呢，憤青們當日忙於N次創作「等埋發叔」，無鳩嗚，無衝突，難得的風平浪靜。諗落要多謝發叔！
彭瑪莉
mailto:[email protected]