香港總商會喺立法會嘅界別代表林健鋒，喺政改表決甩轆，但一眾總商會理事噚日出席該會論壇時，卻紛紛就事件「封口」，其中論壇主持兼理事吳天海，被問到對事件睇法時更即時「借尿遁」，閃咗入廁所。
至於總商會噚日請嚟嘅演講嘉賓、自由黨成員胡漢清，就喺演講時貫徹一向長氣作風，一講就講咗超過一粒鐘，超過大會原定時間，搞到現場有商會成員忍唔住提早離場。胡大狀喺論壇後，繼續健談作風，接受記者訪問長近半粒鐘先走人，其間更因為講嘢講得太耐，企到腰都痛，中途自己走咗去，原來係四圍搵張凳放喺走廊，方便自己舒舒服服咁坐喺走廊繼續受訪。