好多人都知方嘉柏谷草成績好，事實上佢係今季谷草贏馬最多嘅練馬師。咁排第二呢？大家未必噏得出，原來就係徐雨石，佢季內已喺谷草攞到17Win，最近就有匹「王將」，借助見習生黃皓楠減10磅，放到甩轆大勝。
所謂食過翻尋味，禮拜三（24日）石哥有隻「神舟小子」又借助皓楠仔出擊。呢匹馬據知身價唔平，朝早試閘亦常有好走勢勝出，名氣都幾大，雖然在港跑落五戰全落第，但石哥解釋純粹只係較慢熱。
其實「神舟小子」上場初跑谷草已經贏得，但嗰晚亦係皓楠仔第一次跑快活谷，難免有啲騰雞，手忙腳亂，逼唔起隻馬前速，早段墮後甚遠，姍姍來遲。賽後仲畀馬會批評，話佢冇喺直路初及時將隻馬移出外叠衝，錯失良機，咁樣都只輸三個半身位，認真厲害。
好彩皓楠仔冇被飛，今次再騎「神舟小子」，一來經過教訓必小心發揮；二來隻馬今場初次降入四班，對手弱好多；三來繼續排內檔有利，只要騎得好好睇，皓楠仔咪唔使再畀人鬧囉！