有份創立公民黨嘅湯家驊同個黨講bye bye，唔少黨友話無奈之餘亦預咗，未來公民黨仍然要好好走好民主路。而要打好民主戰仗，就要唔少「子彈」，包括資源，最近公民黨就推出一批雨傘運動紀念品籌旗，例如專登揀咗幾張好有代表性嘅相，配上主席余若薇嘅書法墨寶製成雨傘時代文件夾，分別有「生於亂世 有種責任」、「聚傘」及「一起的撐 不枯也不散」，並以「夜盡就是黎明」作結，一套四款盛惠$100，寓意港人發揮雨傘精神，繼續爭取普選。文件夾外，佢哋亦推出「撐起雨傘」咖啡杯，每個$88，底面都有余若薇親題「撐起雨傘」歌詞，「一起的撐不枯也不散」同「任暴雨下志向未倒下」。