港交所（388）行政總裁李小加為人性急，說話快、走路快，同事有公事搵佢商量，最好馬上講出重點，否則應該好快見到佢皺眉頭。如此個性，照理佢食飯都最緊要快，但佢偏偏愛上一款坐低落單，要等上一小時才上枱嘅食物──利苑臘味煲飯（62元位/兩位起）。
中環IFC利苑係李小加其中一個飯堂，原因好簡單，因為近港交所喺IFC嘅寫字樓，佢約人食晏通常揀呢度，方便佢可以最快時間來回辦公室，即使食晏前後有會議，都可以預到時間。
佢去利苑多數會點臘味煲飯，當侍應打開煲蓋，一陣熱騰騰嘅蒸氣升上來，白飯上面鋪滿切得精緻細碎嘅臘腸、膶腸，跟白飯溝勻，啖啖油香，容易食完一碗又一碗。
其實佢都知道臘味煲飯比較油膩，並非健康飲食首選，每次食嘅時候「心情總是好糾結」，邊食邊擔心卡路里超標。
奈何鍾意一道菜與愛上一個人一樣，好多時都係無法解釋，就係久不久想見對方一面。
李小加剛與港交所續約3年，佢可以繼續與煲仔飯糾結下去。好在佢閒時鍾意踢波，踢多幾場波就可以keep住𠵱家咁弗喇。
記者：高淑嫻
蘋果20年 企硬我敢言
http://20.appledaily.com