國泰航空（293）前行政總裁湯彥麟（Tony Tyler）早前同華華敍舊，呢位有航空業李察基爾之稱嘅靚佬風采依然。佢同華華講，已計劃好退休後搬返香港，但又擔心太熱，夏天會搬去法國避暑，相當識嘆。
自2011年離開國泰後，湯彥麟去咗國際民航運輸協會（IATA）做理事長打風流工，常駐瑞士。理事長任期今年屆滿，到時60歲嘅湯彥麟未知會唔會留任，但佢話喺香港與法國南部都有物業，退休後一定會搬返香港，到時大家有好多機會見到佢。
查實湯彥麟1977年開始幫國泰母公司太古集團打工，喺香港住咗成30年，鍾意返來香港都唔出奇。
講起本港航空業熱話，即係機場第三條跑道，湯彥麟話當年港府興建地鐵同樣影響好多人，但起好後經濟起飛，反映基建運輸對香港有好大幫助，亦相信好多人都會理解同支持。