中環在線:彤叔全身而退辭晒上市職銜 - 李華華

中環在線:彤叔全身而退
辭晒上市職銜 - 李華華

新世界發展(017)創辦人鄭裕彤(彤叔)自從2012年9月入院之後,一直未有公開露面,今年初佢已經陸續辭去萬邦(158)、利福(1212)嘅董事職位。賭王何鴻燊旗下信德(242)上星期五召開股東會,彤叔亦唔再尋求連任非執董,辭埋呢間,佢已經冇晒上市公司嘅職銜。
彤叔3年前已經辭去新世界系內上市公司嘅董事職務,將上市王國交晒畀阿仔鄭家純,之後佢身體抱恙,都冇公開現身,佢擔任董事嘅上市公司每年召開股東會,佢都冇出現,佢陸續辭任其實都正常嘅。
佢跟賭王何鴻燊份屬友好,1982年就擔任信德非執董,至今已經有33年。