練馬師蔡約翰第三、四場贏「飛廉之子」、「鑽之友」起孖，逼番近榜首大摩，兩win分別由柏寶及田泰安經手，統統冇雷神份。到了第五場三班草地千六米，大摩立即作出反擊，起用雷神夾手夾腳贏番隻2.7倍大熱門「再出奇」補數，當中大摩連續贏到第六次沙田賽事冇斷纜，頭馬增至59場，暫時領先56場之蔡約翰、方嘉柏3win。
至於雷神，連同頭場勝出賀廐「團圓飛舞」在內宣告起孖。
今場比賽期間風雲色變，行雷閃電天都黑埋，在大雨下作賽，早段一片迷濛視野糢糊，完全睇唔到邊隻打邊隻，直路視野只是稍好，即見雷神騎「再出奇」沿內欄左穿右插力追長驅直進，贏得相當輕鬆。
閘前落飛之「小龍兒」跟住「再出奇」上前，贏唔到亦有第二，由呢對新上名馬包辦13倍Q，今季跑咗21場三班田草千六米，其中20場都有呢類馬入圍，數據好突出。「英才」換潘頓後上追番個第三算有交代，第四名係「開心旅程」，四重彩僅2,725元好奀。