香港影壇一代笑匠吳耀漢，出生富裕家庭，父親有四位妻子。吳耀漢母親早逝，曾自稱「孤兒」的他童年過得不快樂，但卻組織了一個圓滿家庭。吳耀漢與妻子蘇珊結婚五十年，育有三女一子，其中兒子吳嘉龍跟父親入行拍戲。今個父親節，吳耀漢一家於西貢家中的天台花園BBQ，簡簡單單的已最珍貴。
吳耀漢內在是個百分百的Family Man，而吳嘉龍深受父親影響，現有一半時間周遊列國，但返到香港，他總愛回家與父親談心。趁着父親節，吳嘉龍買了藍色外套作為禮物，二人父子裝上陣，吳耀漢說：「好鍾意、呢件好型。佢細個時，我買衫都會買埋畀佢，我唔介意父子裝！但我知佢介意。」
年屆75歲的吳耀漢依然健壯，但他感慨生命脆弱，希望多與仔女聚會：「于楓之前過身先得63歲，諗番早一、兩年都仲見到佢，又bye bye咗一個。」
爆仔唔儲錢
問到會否期望吳嘉龍早日結婚生仔？吳耀漢笑說：「佢邊有資格結婚？一個月3,000蚊都未儲到！結婚何止買樓？學費幾多錢呀？養個老婆幾多錢呀？今時今日喺香港結婚係大禍嚟㗎，簡直係大禍臨頭。」他更當面教仔說：「父親節，老竇畀啲好嘅建議你，結婚要拒絕銀行戶口係用女人個名，幾大都話no！因為呢樣嘢係會製造好多問題。有老婆，唔好每一次都畀佢，耐不耐要餓吓佢，唔好咁順攤，會疼壞佢哋。」兩父子互望後嘻哈大笑。
撰文：羅慧敏