柏克萊出品，必屬佳品！今次輪到上個月先滿22歲嘅靚女飛魚鄭莉梅（Camille），上周五喺美國職業游泳系列賽聖克拉拉站，先喺女子200米自由泳殺入決賽，同美國「女費斯」法蘭克琳（Missy Franklin）同場較量，最後得第六名嘅佢，隨後帶領港隊取得4x100米自由泳接力賽銀牌，係歷來最好成績。
助港隊歷史性奪接力銀牌
香港有唔少游泳名將都係來自美國柏克萊大學，之前有蔡曉慧同韋漢娜，最近就有舊年先畢業嘅「美人魚」歐鎧淳；至於Camille同江忞懿就啱啱喺上個月畢業，而以上咁多位更全部都係亞運獎牌得主。其中喺香港出世嘅Camille，爸爸係台灣人、媽咪係法國人，擁有混血靚樣嘅佢話：「聖克拉拉呢個比賽係我繼三月NCAA（全美大學生）游泳賽幫柏克萊攞冠軍後嘅第一個比賽，其實好緊張，但能夠喺個人賽殺入決賽，總算有個好開始。」
細細個喺香港讀法國國際學校、九歲已隨父母旅居北京嘅Camille，平時低調得嚟仲好斯文，舊年仁川亞運，佢同何詩蓓、歐鎧淳及施幸余，合力幫香港攞到兩面銅牌。到上個禮拜五嘅聖克拉拉泳賽，Camille先喺200米自由泳初賽以2分00秒04以第八名晉身決賽。決賽同場有美國嘅倫奧四金得主法蘭克琳，仲有荷蘭籍奧運獎牌泳手咸姆絲卻，全部都達到世界級水準，最後Camille以1分59秒60得第六名，咸姆絲卻則以1分55秒68奪冠，法蘭克琳以1分57秒02攞季軍。美中不足係Camille破唔到自己保持嘅香港紀錄（1分58秒99），同時亦達唔到1分58秒96嘅奧運A標。
200米自由泳決賽之後，Camille、施幸余、劉彥恩同陳健樂嘅港隊接力以3分51秒29奪得銀牌，僅以1點25秒輸咗畀墨西哥，四個女將可以瓜分200美元獎金（約1,550港元）。
每日同Missy練水升呢
Camille平時一齊喺柏大同師妹法蘭克琳練水，今年三月更齊齊幫學界贏得NCAA冠軍，佢話：「每日同Missy呢個級數嘅泳手練水，獲益良多，所以上月畢業後，仍繼續留喺學校練習；為咗明年里約奧運，會做一年全職泳手。」Camille之後仲有50米同100米自由泳，試圖衝擊奧運A標。
男子組方面，港將謝旻樹都有唔錯開始，喺100米蝶初賽以53秒86第11名晉身B組決賽，最後以53秒73贏該組第一，總排名第10。未來兩日比賽都有港將出戰，包括剛考完中學文憑試嘅「小飛魚」何詩蓓，佢會出戰50米自由泳。
蘋果20年 企硬我敢言
http://20.appledaily.com