選美出身的何傲兒，入行7年，即使拍過不少劇集，但令人留下深刻印象的，一定是她去年分別與林建名和周子揚之間的「爺孫戀」和「兒子戀」，儘管何傲兒不認為此事對她的形象有太大的影響，但她說：「我一直以為自己係百毒不侵嘅人，點知原來都為件事有唔開心，我唔鍾意爭，唔鍾意嗌交，好多嘢都好隨緣，只係啲報道寫到我係一個好犀利嘅女仔。」
撰文：何慧斯
集萬千寵愛在一身的何傲兒，日前在助手、髮型師和化妝師的陪同下，接受《蘋果》專訪。對於爺孫戀終於在工作上「修成正果」，傲兒透露當林建名知道她有意外闖後，已經邀請她加盟，但同時亦有不少公司向她招手，經過一番考量，傲兒最終選擇林建名，原因只有一個，就是信任：「始終自己一個人出闖，要簽一段時間，所以要好小心，我覺得呢度好似係一個防護網，可以保護到我，一定係安全，而且林生有間好嘅娛樂公司，我係一個鍾意做嘢嘅女仔，我相信自己會不斷進步。」問她事前有否預計會有閒言閒語？她說：「我簽嗰陣都預咗人哋會咁諗，做藝人又唔使將呢啲擺喺個心度，總之呢啲係唔會、唔係同冇可能，只要我個心正咪得，唔應該因為呢啲事影響工作上嘅關係，反正相信嘅人一定會信，簽同唔簽都冇關。」
「我走得好靚」
近期爆出不少藝員在傾續約過程中曾發生不愉快經歷，湊巧她上月初在微博宣佈約滿，一番肺腑之言，似乎有暗示，對此傲兒說：「我哋一年前已經開始傾，我唔知點解佢哋要走，每個人走都有原因，我走唔係因為公司對我唔好，係timing問題，𠵱家諗番成件事，好感恩身邊有好多錫我嘅人，我走得好靚，呢個決定對我係好大膽，但係佢哋都有支持我，覺得出去闖吓唔係一件壞事，所以更加有信心去試。」
一直以來，傲兒覺得自己在溫室中長大，但之前的新聞令她成長不少：「我一直以為自己係百毒不侵嘅人，點知原來都會唔開心，一啲唔係真嘅嘢，寫寫吓都會介意，亦體會到傳媒支筆好似一把無形嘅刀，做藝人食得鹹魚抵得渴，我俾人寫唔緊要，但係點解要寫埋我屋企人？雖然爸爸覺得唔緊要，但係我做佢個女，我好戥佢心痛。」她更有感而發稱：「我唔鍾意爭，唔鍾意嗌交，好多嘢都好隨緣，只係啲報道寫到我好犀利咁，事實上我冇乜嘢太大嘅經歷，只係想將最真最開心嘅一面畀大家見到。」
「緣份到咪嚟」
傲兒的名字經常周旋於林建名和周子揚之間，難免令人覺得她左右逢源，形象受損，問她會否希望洗底改形象，她說：「過去發生咗咁多嘢，令到我嘅言行受到關注，但我覺得唔係壞事，可以令更加多人認識我。我唔覺得需要洗底，我相信時間可以證明一切，傳聞嘅嘢，咪影幅相嚟睇下，呢啲嘢唔會影響到我，我會更加堅強去面對新挑戰，我係個努力工作嘅人，希望嚟緊會有好嘅作品，令大家記得我。」
儘管何傲兒認為緋聞未有對形象有太大影響，但其助手事前已明言希望避談周子揚，所以當問到周子揚有否支持時？傲兒只說身邊好多朋友都支持，她說：「𠵱家年紀仲細，唔心急去搵另一半，緣份到咪嚟，如果佢係個right person，我唔會隱瞞，我好想得到大家嘅祝福，亦唔覺得公開戀情會影響事業，不過呢個人仲未出現，仲等緊。」
髮型：Chris chan of Leighton aveda
化妝：Gigi Chu
服裝：Novelty Lane
【放不開性感底線】
何傲兒離開無綫前，接拍了一套扮醜女的劇集，作為她離開前最後一個作品，問到當中有甚麼意思，她笑說：「我有時會諗點樣可以畀另類感覺啲觀眾呢？大家可能喺台慶見過佢有幾靚，但係未見過我另一方面係點，雖然未睇到我喺裏面嘅角色性格，但係起碼有一個迴響。」傲兒續說：「我希望自己喺呢個方向裏面不斷進步，做演員係乜都要試，點解有機會唔試？機會到咗梗係好樂意去試，呢啲係一個挑戰，唯一係性感，我暫時都未係好放開。」至於會否叫林生開戲？她笑說：「呢啲要問番佢喎，不過我知道有啲電影喺度傾緊，有啲工作plan畀我。」
