現年62歲夏韶聲一頭招牌長髮，夾Band、玩槍、愛研究外星人「陳仔」，Kidult身份當之無愧。不過當與二女Michelle和3歲的外孫仔Kyle一齊玩，平時如何硬朗的有型外公都一樣融化，笑到見牙唔見眼。
訪問當日，夏韶聲三代同堂到場，Band房中叱咤風雲的卻是夏韶聲口中的「老細」，當日正是Kyle的3歲生日。抱着外孫，慈祥的眼神和聲線，強勁的鼓聲打出的，是Kyle學校學的兒歌。今年父親節，夏韶聲只希望靜靜的打個邊爐，他說：「都冇乜特別慶祝，住得遠，十幾分鐘車程先見到有人煙。」
Michelle笑着說：「每星期都會同爹哋食飯，不過啲孫一出世，我哋啲地位就降晒，唔係排第一。以前出親碟，限量版靚號碼都係畀我同家姐，𠵱家就畀晒三個孫。」夏韶聲嘴角招積揚起，滿足地說：「大孫仔都就快5歲，以前成日聽人講做咗阿爺阿公輩會錫晒啲孫仔，點知真係會。心情同當年湊女唔同嚕，湊好辛苦嘅，我玩得喇，湊交畀佢哋。」Michelle說：「我都唔敢畀佢湊，Kyle成日都提住公公，就知佢係玩嘅使者。」
「希望佢哋孝順」
問到對外孫們的心願，夏韶聲說：「佢哋將來係點我可能睇唔到，希望佢哋都要留啲傳統，要孝順，最緊要身體健康、生活開心。我細個冇教兩個女音樂，𠵱家嘅樂器就會留畀三個孫，因為音樂對佢哋會有好好嘅影響。」
撰文：藍文浩
場地：通利音樂演藝中心
