有份演日本片《海街女孩日記》嘅廣瀨鈴今年爆紅，可惜呢位妹妹仔頻頻開口夾着脷。繼之前喺《VS嵐》入面話大野智樣老似40歲之後，大前日喺搞笑組合TUNNELS嘅節目入面，踩做燈光音響嘅工作人員，立即被網民瘋狂圍插。
鈴妹喺節目度話：「唔明啲人點解要搏命爬咁高去整啲燈飾。點解會有人大個咗之後想去做燈光？」仲話：「音響都係，點解要花自己嘅人生去為啲演員收音。」呢啲聽落好藐視人哋工作嘅說話，好多人覺得佢恃寵生驕，但都有人幫口話佢始終年輕，結果兩日以來就有過五千條留言狂插佢，插佢嘅留言仲有幾萬個讚，結果，鈴妹要喺前日17歲生日當日喺網上留言道歉，但由於佢話係誤會，再俾人狂插佢唔知錯！
撰文：李村姑