英超上個禮拜三出咗2015/16球季賽程，博彩公司Paddy Power日前透露早飛行情，最被人睇好贏到冠軍嘅球隊居然係阿仙奴；而喺對上四季兩次奪冠嘅曼城就冇乜人吼，只係得8%嘅賭仔喺早飛買佢哋。咁又難怪，藍月亮今夏嘅收購目標竟然係史達寧同埋韋舒亞呢啲名大於實嘅英格蘭人，級數同以往買返嚟嘅球星，好似耶耶托尼同阿古路等都差得遠，俾人睇好就奇！
僅得8%落注撐曼城
2015/16球季英超秩序喺上周三出爐，根據博彩公司Paddy Power提供嘅英超冠軍賠率（見附表），最熱嗰隊係車路士，之後就係曼城、阿仙奴同曼聯。
但係俾博彩公司睇好嘅，坊間又未必認同，事關由Paddy Power提供嘅資料顯示，早飛最多人買嘅係阿仙奴，比率有26%；排第二嘅係曼聯，佔咗23%；至於大熱門車仔只係以19%排第三。咁都未算，早飛買利物浦嘅居然仲多過曼城，曼城僅得8%嘅賭仔支持。曼城假假地喺近四季兩度封王，但家陣得咁少人支持佢哋，可能同佢哋今夏嘅買人政策有關。
買史達寧韋舒亞隨時出事
由於曼城有中場林柏特同占士米拿分別借用期滿同約滿離隊，所以要買番啲英格蘭人，若然唔係就唔夠數，做到起碼要有八個本土培訓球員。連佢哋嘅龍門赫特都承認：「我哋冇咗林柏特同占士米拿之後，英格蘭球員喺我哋份買人名單上應該排最前；又或者我哋要喺預備組提升幾個本土球員上嚟。」曼城嘅目標人物分別係利物浦翼鋒史達寧同埋阿仙奴中場韋舒亞，其中仲先後出3,500萬鎊同4,000萬鎊買史達寧，但都俾紅軍拒絕咗；至於韋煙王，聽講佢哋就想出4,000萬鎊喺兵工廠買佢返嚟。
史達寧同韋舒亞係好波，但始終冇喺大賽好似歐聯或世盃證明過自己，所以並唔係好似英國傳媒講到咁勁囉。仲有就係，佢哋兩個都係麻煩友，場外負面新聞多多，其中韋舒亞仲衰多樣係藥煲，黑仔起上嚟隨時全季養傷。若然曼城真係用超過8,000萬鎊買呢啲「蟹貨」，睇嚟比歷連尼喺剛結束嘅球季暫保份工，新一季都會「及早離去」。
識睇，一定係睇足英台【英波Live】：
http://soccer.appledaily.com
http://bit.ly/engballlive