李悅彤（Liddy）去年5月26日被本報娛樂版C1頭條獨家踢爆，她與已婚導演彭順在圓方拍拖。6月1日槍手李德仁在九龍灣殺人後吞槍自殺，兩日後再被本報以A1頭條獨家揭露父女關係。一星期內橫跨本報A、C叠頭條的Liddy，早前為本報20周年報慶接受訪問，重提她一生最大的遺憾，更寫了400字自白訴心聲。
在偷情報道後，Liddy一直關掉手機，直至在電視看到爸爸的新聞，才發覺漏接了他的電話，哭成淚人的Liddy說：「佢搵唔到我留言，內容係話『阿爸冇用，照顧唔到你哋，來生再見。』如果當時聽到個電話，可能件事唔會係咁，好遺憾。」更絕望的是彭順竟然連一個電話慰問都沒有，事件令Liddy體會親情比愛情重要，甘願現身面對傳媒追訪，也堅持要親身認領遺體。
總結童年，Liddy生活不富裕卻滿足：「印象最深是5歲嗰年，爹哋帶我哋一家去世界之窗，感覺好似遊歷過全世界咁。」她笑言亡父有不少奇趣行為，會喜歡將腳放在兩姊妹的膊頭上當腳枕，謂代表孝心，又不時要女兒親吻自己的腳，Liddy笑說：「佢話咁就孝順嘞，又要我哋食雞頭同魚眼，話咁樣對眼會靚，有時佢搵到錢返嚟會專登叫醒我哋派錢。」
撰文：何永寧
李悅彤自白全文：
無可奈何，糾結矛盾，百感交集，既愛且恨。肉捶砧板上，硬食無得say no……件事出咗嚟之後有好多不實嘅報道，但過程係你冇得講嘢，冇得郁。好似俾人強姦咁無助、害怕、憤怒，之後造成咗一個好大嘅心理陰影。我個人比較悲觀脆弱，所以呢個阻礙係要比人多好多時間去洗自己腦，去接受呢個可不完美嘅自己。
《蘋果》確實畀咗我一個重大的人生轉捩點，永遠都磨滅唔到嘅痕迹。呢個轉捩點成就咗今日嘅我，我都唔知係好定唔好，大家即管放長雙眼去睇，我自己都好想知！好多嘢其實真係一線之差，一念天堂，一念地獄。so，let's see！
可能就係咁同《蘋果》結下不解緣，《蘋果》無疑係我生命裏面成為咗個重要嘅客人。咁啱你們20周年我件事又咁轟動地由你哋報道出嚟先可以參與到訪問成為座上客，如果唔係受訪通常都係啲名人，加上我已經冇新聞價值，點輪到我，所以唔知應該笑定喊好。哈哈！感到榮幸，可以參與咁開心嘅周年慶祝，好受寵若驚。呢個訪問係一個美好難忘回憶！
蘋果20年 企硬我敢言
http://20.appledaily.com