季尾有唔少馬匹搏到七七八八，久休復出馬恃住體力較佳，經常佔到甜頭。近三戰就分別有「新添」、「詠彩繽紛」同「醉中意」休息三個月或以上復出立即交出表現。禮拜日又有七駒距上仗已三個月，當中一對賀廐馬「揮闖」同「綠野仙踪」最值得捧場。賀賢玩久休復出有一手，須知佢馬房近五匹休息三個月或以上復出之馬，總成績兩冠一亞一殿，僅一駒不入前四名，其中「兵威振」同「怡昌之星」都喺豹隱超過100日後復出即贏，充份證明廐主呢方面功夫確係唔簡單。
禮拜日第二場「揮闖」自2月7日賽後就冇再上陣，期間曾於4月26日排位後退出，不過幾日後可以復課，證明健康冇大礙，上星期二試田草大閘有前有後，為今戰蓄銳一擊做好準備；至於第六場「綠野仙踪」田草只曾於1800米上名，上賽戴面箍跑表現有改善，C欄之前近過，埋門兩試大閘，擺明有的放矢，唞夠復出隨時一錘定音。