《蘋果日報》娛樂版歷年來揭開不少娛圈真相，適逢今天是《蘋果日報》創刊20周年，登上本報美人榜的不少，但真正能成為話題的首推以下四位不同年代的美女！影后劉嘉玲經歷過不少風波，一路走來卻越活越精采；李嘉欣是真正的大美人，她的婚姻她的感情仍然是港人話題；周秀娜將𡃁模熱潮推上高峯，更是少數能站穩娛樂圈的新一代美女；Liddy李悅彤人生因《蘋果日報》而改變，從C1走到A1，高低起伏在今次專訪一次細訴。
蘇州姑娘劉嘉玲，從15歲隨父母赴香港定居，本來廣東話不靈光的她，無法加入電視藝員訓練班，幸而導師劉芳剛83年破格取錄，憑着努力和天賦，今日的嘉玲已成為影壇閃耀明星，趁着《蘋果》20周年大日子，找來她做專訪，暢談婚後與梁朝偉的生活點滴。
劉嘉玲與梁朝偉由拍拖到成為夫妻，已經共同生活了27年，雖然兩人性格迥異，一個好靜、一個好動。越成熟越能耐得寂寞的偉仔，在生活細節上更享受獨自一人的時光，作為他枕邊人的嘉玲，真的有無限忍耐力，所以偉仔很清楚知道，這生能與他長相廝守的人，肯定是劉嘉玲。
連爭拗都有默契
由08年結婚至今，嘉玲形容夫妻間感情更加成熟，最起碼吵架時，雙方都會不再說話，免傷和氣，她說：「以前我哋頂頸，各不相讓，可以嘈完幾日互不瞅睬，但𠵱家拗兩句就會唔講嘢彈開，免傷感情。」一般會為何事引起爭拗呢？嘉玲笑說：「好多時都係為好小嘅事，小到係佢講嘢畀我感覺係晦氣就會辣着我。」嘉玲指偉仔越來越怕生外，不想去應酬，只喜歡留在家中。她表示：「我有時都會出街同朋友食飯或出差做嘢、去吓旅行，留佢一個人喺屋企，佢可能覺得更自在，其實兩個人有兩個人嘅舒服，但我哋都慣咗要畀對方有空間，叫佢日日黐住我，我都唔得啦！好似出去行咁，如果佢喺度，想望吓啲靚男仔都唔得啦！因為佢喺度嘅話，我都要照顧吓佢感受。其實我好鍾意男仔有幽默感、反應快同玩得，同呢啲人一齊，個人都會開心。」
問嘉玲喜歡好動的熱情男，為何卻選了一個大悶蛋梁朝偉做老公呢？她哈哈笑說：「佢雖然悶，但佢都有好多優點，其實佢都有幽默感，只不過佢唔會喺大班朋友面前講個笑話畀你知。我喜歡同成功嘅人做朋友，因為呢啲人世界觀同處理人嘅手法都有獨特見解，我會喺佢哋身上學到嘢，我喺偉仔身上都吸收到唔少嘢，佢嘅耐性可以無限大，好似我都唔明白佢可以忍受一個導演拍部戲唔知4年完，定6年完，我真係唔得，但佢就好自在，覺得好有安全感，答我總會拍完，就算拍10年都唔緊要，呢個係佢同王導演合作嘅微妙關係。」
近年積極進軍商界的嘉玲，做得有聲有色，但她堅持不會因為從商放棄演藝圈工作，因為她努力做好「劉嘉玲」這品牌，持續保持高人氣，對其做生意會有利。
撰文：陳月媚
蘋果20年 企硬我敢言
http://20.appledaily.com