中間人：好彩最後無俾錢養長毛兩世！如果唔係，買咗佢1票，或者買晒泛民4票，但最後你批建制派原來無端端走咗票，咁我即係買咗架車原來只係得4個車轆其他乜都無！
C朗：大家都話林前鋒想裝越位但失敗咗，留低咗8個隊友喺度包越位陷阱。
我絕對唔同意呢個講法。
一般裝越位陷阱，都係敵人傳緊波嘅時候裝，從無聽過敵人已經入咗禁區起緊腳「射啊射射他吧」嘅時候，仲會叫自己隊友向後撤退裝越位陷阱囉！
仲有啊，想當年有球員「單刀橫傳」同「底線傳底」，但今日林前鋒示範咗更高嘅一招，「單刀埋門等埋發叔」，入到禁區對住龍門，竟然唔射，仲要用手執起個波問球證「可唔可以等埋發叔先射？」豬一樣的隊友，紅牌離場啦！
議員亮星爺：當大隊離場嘅時候，我的確唔知點解要走。但根據常規，「不要問，先起行」，所以我乜都唔問，跟風走人。身為一個專業嘅奴才，首要條件就係唔用腦。「聽話」而唔係「問話」。
我曾經講過，母親節就嚟到，你信唔信阿媽？阿媽幫我揀老婆都無問題。
家陣父親節就嚟到，你信唔你阿爸？我信，所以阿爸話走我就走。無錯，鋒鋒就係我阿爸……
潛水嫻姐：當時，譚Sir的確有同我講過話要出去，佢話要等埋一個人投票。
我反應係「O嘴」，即係今日大家喺FB度Share嗰幅圖。
點解？因為譚Sir同我講，嫻姐，我哋等埋黃宏發先投票啦。
我無屈佢，譚Sir後來見記者都話要等黃宏發㗎。
其他人有叫我一齊出去，但經過懷仔呢件事，我唔會再輕信其他人嘅說話，我唔會咁容易企出嚟㗎啦。
田少：人蠢。講完。