生日快樂！6月20日除了是《蘋果日報》創刊20周年大喜日子，更加是大美人李嘉欣45歲生日。問嘉欣今年有甚麼生日願望，她說：「生日願望好簡單，最緊要身體健康，開開心心。」嘉欣恰巧與《蘋果》同一天生日，覺得跟《蘋果》有甚麼相同之處？嘉欣即笑說：「大家一樣經得起時間考驗！」
嘉欣分別在2008及2011年完成結婚、生子兩件人生大事，但原來她還有心願未達成。她說：「成日都想start up一個生意，但一直都未諗到做乜。我想做一樣嘢係自己好鍾意，會令我越做越癡迷嘅生意，因為咁樣先至會好投入去做。」問嘉欣可有向老公許晉亨取經？她即笑言：「有呀！佢嘅答案係想我做番自己啲嘢先！」
婚後的嘉欣相夫教子，同時兼顧演藝工作，是百分百事業型女性。那麼嘉欣是否做每件事都有周詳計劃，還是喜歡活在當下，盡情享受生活？嘉欣謂：「我只會活在當下，因為好多嘢話嚟就嚟，話走就走，根本預計唔到，而且我本來就唔係一個有計劃嘅人。」
安排囝囝做model
不過，嘉欣承認寶貝仔許建彤（Jayden Max）出生後，自己的確比以前多了一點計劃：「屋企有咗小朋友，好多嘢做之前都會計劃吓，至少唔會話飛就飛，但計劃都係好短時間嘅嘢，唔會計劃5、6年後，咁樣太浪費我青春喇！」
說到Jayden，嘉欣嘴邊總會流露笑容，問她如果要給囝囝人生座右銘，會跟囝囝說甚麼？嘉欣認為身教最重要，正如李媽媽同樣以身教提醒她和姊姊，要努力做好每件事，對人生負責任。她說：「我都希望我下一代都會好努力，因為呢個好緊要，佢哋𠵱家環境可能比我以前好，但冇人知環境幾時會變，有乜要克服，所以要有呢個態度，做事唔可以是旦，反而叻唔叻唔重要！」
近年娛樂圈湧現不少星二代，嘉欣表示不會刻意思考囝囝將來做甚麼職業，現在談這個亦言之過早：「小朋友成日都會變，佢今日話要做飛機師，第2日又話要做model。不過佢將來做乜都會support，反正年輕人，你唔畀佢做，佢都一定會千方百計去做！」嘉欣又爆囝囝經常在家扮model趣事，她說：「Jayden有時會喺屋企攞住啲袋行嚟行去，可能做嘢帶過佢出嚟，佢見到model唔笑咁行騷，返到屋企就有樣學樣，我就同佢講，如果想做model仔，可以安排畀佢玩吓，但其實佢只係鍾意喺屋企行。」
今日是《蘋果日報》創刊20周年，問嘉欣對《蘋果》感覺，嘉欣直言不想被狗仔隊跟，她笑說：「狗仔隊最好唔好跟我啦！如果要跟就要影靚啲，影到小朋友一定要打格仔！」她又讚《蘋果》內容越來越多深層次內容。笑問嘉欣可曾為哪篇報道不開心？她即哈哈笑說：「我肯定有嘅！但係我啲記憶得24小時，所以唔記得！咁希望以後都唔會有啦！」
撰文：鄉奈仁
蘋果20年 企硬我敢言
http://20.appledaily.com