蘋果日報（六月十六日A24版）刊登之非洲飢童等死照片（The Starving of Sudan）實在令人觸目驚心，難以抒懷，如放在餐枱上，更係逼人節食減肥嘅絕招。瑞士一間酒店用呢幀圖片（輔中英文說明）放在餐廳餐桌上，用以警惕中國遊客食自助餐不可浪費，中國遊客應覺得羞恥。其實歐洲酒店啲自助餐，在款式及種類方面，遠不如東南亞啲四五星酒店，到東南亞吃酒店自助餐，方知強國人遊客浪費食物如何厲害。
不過，在香港酒店吃自助餐，本地人都唔見得幾慳箒，香港人咪一樣，如有北海道凍蟹出現，兩位排在前頭師奶已經夠膽將成盤蟹腳拿走，令排第三位，站在後面嘅記者小G面對空盤發呆！
夏日遊歐洲，唔講浪費食物，應該係好爽嘅。呢晚食飯，班老友講夏天旅遊，分析F話佢成家人會先到伊斯坦堡，再到威尼斯，然後去米蘭參觀世界博覽，跟住去英國利物浦及曼徹斯特。大家問佢行程編排有何特別目的呀？好少人去利物浦嘅噃？分析F話要帶兒子去領略城市盛衰歷史，譬如伊斯坦堡古稱康士坦丁堡，係東羅馬帝國首都，盛極一時，威尼斯曾是歐洲在中世紀時最大東西貿易城市，利物浦係英國造船工業大本營，英國海上力量由利物浦啟航（董建華身為船王公子，在60年代就到利物浦大學讀書，當然係有目的嘅），曼徹斯特今天只以足球聞名世界，但在18、19世紀，係英國工業之都。以上各大城市繁華動力，而今安在哉，只餘後人讀史憑弔。分析F話要兒子領略，一個大城市之繁華未必可以持續永久，他日如香港淪落到利物浦咁樣失去地區重要性，會係乜嘢原因呢？
講到咁沉重歷史感覺，左丁山一時之間消化唔到，只能夠講，去利物浦睇吓披頭四「古蹟」都係好嘅。財務W就話米蘭世博無謂參觀嘞，費事人逼人，佢自己本來都想去行吓，但上網查過資料，米蘭世博已售出三百萬張門票，其中一百萬張由強國人買咗，即係話在世博舉行期間，有起碼一百萬強國遊客在歐洲自由行，逼爆米蘭羅馬巴黎倫敦等熱門城市，所以佢打了退堂鼓，今個夏天不去歐洲與同胞爭的士及火車票咯！嘩，咁多中國遊客到米蘭，啲意大利扒手黨、劫匪開心死咯，年輕女律師S上月到羅馬，第一晚在大街上就俾人㩒住搶走手袋，各位老友暑假遊意大利西班牙法國，慎防財物損失呀！