立法會呢幾日因應政改表決而發出黃色警示，連立法會餐廳都唔開門做生意，搞到議員助理、傳媒想買飯食時勁唔方便。噚日秘書處諗住做好心，一口氣承包咗十幾廿個飯盒（圖），諗住午飯時間賣番俾記者，點知又撞正政改表決，令啲飯盒一度滯銷。
政改否決就預咗㗎喇，但確實冇人諗到噚日迅雷不及掩耳，中午時分就可以投票，更加冇諗過經民聯咁為鄉議局主席劉皇發着想，為幫發叔立此存照鋌而走險，再更加估唔到建制派冇默契到咁嘅地步。試問當時風頭火勢，做傳媒嘅仲有時間食飯呢？秘書處亦因而嗌晒救命，擔心買落咁多飯盒冇人食咪變大嘥鬼？好彩忙完一輪後，八方嘅行家幫襯買啲飯盒醫肚，令秘書處避過變成大嘥鬼一劫。