江南集團（1366）本身已經係祖國最大電線電纜商之一，呢期集團密密地進行併購工作，再食住祖國嘅強勁需求，真係有心向行頭巨無霸晒士進發，而明年預測得6倍PE，比起祖國行家平咗一大截！
食正電纜需求激增
唔計一帶一路走出去海外嘅商機，祖國包括城鎮化同環保需求下嘅電網基建需求，阿爺已經計劃，去到2020年時，國家電網投資，去到1萬億元人仔。又連埋鐵路每年8,000億元人仔投資嘅投放，江南主打瓣數食到應一應。又喺呢個靚仔基礎底下，江南就估計，喺未來三、五年間，會出現收入規模高達200億元人仔嘅電纜企業。江南亦話，會以呢個巨無霸級江湖地位做目標。
啱啱喺前個月，江南亦橫向併購兩間行家。又喺阿爺打貪，貫徹公正公開「陽光採購」招標程序底下，上年嘅收入就增加咗26%，達到82億元人仔。
成個picture就係，江南係領導性電線電纜商，喺嚴格招標當中，又見到江南產品競爭優勢，加埋呢期新收購，實力進一步坐大。配合埋祖國勁厚商機，江南真係有機會問鼎大哥大電纜級數企業，所講營收target，係集團上年收入2.4倍！江南若果順風順水，真係肥過肥仔水！
咪扯咁遠，隨住新購項目今年反映，江南張成績單，應該仲靚仔。場內專業評估，江南今、明兩年EPS 0.303港元同0.38港元，增長23%同25%，明年預測6.5倍PE。祖國行家東方電纜（滬603606）家陣過百倍PE，今年無預測，而遠東電纜（滬600869）預測73倍PE、德威新材（深300325）91倍PE，江南起碼平咗87%！呢轉買江南，現價（2.49元）當翻半番到3.7元計數，預測PE都係得9.7倍，仲未去到雙位數之時，比起行家，仍然係平到笑。
錢雋
細價股專家
本欄逢周一、三、五刊出